Die 15-jarige Izanne Reyneke is op ’n missie om hierdie Kersseisoen ’n verskil in Krugersdorp te maak as deel van ’n plaaslike skoonheidskompetisie se gemeenskapsprojek.

Haar ma, Lezanne Kleynhans, vertel dat Izanne deur die jaar geskenke ingesamel het met die hulp van mense wat sy bymekaar gebring het. Die Hoërskool Florida-leerder gaan die geskenke aan kinders van die Miracle Mission Children’s Home uitdeel.

“Sy glo elke kind verdien om op Kersdag ’n geskenk oop te maak. Sy het ’n groot liefde vir kinders en probeer altyd help waar sy kan – al is sy self nog ’n kind,” het Lezanne gesê.

Dit is nie die eerste keer dat Izanne dit doen nie. Hierdie is al die derde jaar wat sy geskenke uitdeel tydens die feestyd.

“Om die kinders se glimlaggies en dankbaarheid te sien, is die beste gevoel op aarde. Ek is dankbaar dat ek dit elke keer kan moontlik maak,” het Izanne afgesluit.