Een van Krugersdorp se oudste en mees geliefde inwoners, Francine Snyman – beter bekend as Tannie Koekie – is kort ná haar 100ste verjaarsdag oorlede.

• Lees ook: Tannie Koekie vier 100 jaar

Sy is op 18 Maart 1926 gebore en het op 23 Maart gesterf nadat sy, volgens haar seun Stanley Peterson, weens ’n beroerte vir twee dae in ’n koma in die hospitaal was.

Tannie Koekie, tot onlangs die oudste inwoner van die Memorial-woonstelle, het in die Johannesburg-omgewing grootgeword en was baie jare lank aktief betrokke by St John’s Ambulance. Sy was bekend vir haar elegante voorkoms, haar liefde vir dans, en haar passie om ander te dien.

Volgens haar seun was sy ’n ekstrovert wat daarvan gehou het om ander te help. Sy het duisende mussies gehekel en klere vir ander, insluitend minderbevoorregtes, gemaak en geskenk.

In ooreenstemming met haar onselfsugtige lewensbenadering het sy haar liggaam aan ’n universiteit geskenk vir studiedoeleindes, en daarom sal daar geen tradisionele begrafnis wees nie. ’n Intieme lewensviering is saam met familie en vriende gehou.

Op haar 99ste verjaarsdag het sy verklap dat die geheim tot ’n lang lewe is om gesond te bly, aktief te wees en ander te help.

Lees ‘n meer in-diepte artikel oor Tannie Koekie in die News se 10 April-uitgawe.