Adjudant-offisier Marius Bam (60) het sy loopbaan aan die polisie gewy en het onlangs afgetree ná 42 jaar en 10 maande diens.

Bam was verbonde aan die polisie se Wes-Rand-blitspatrollie en het op 31 Maart vir die laaste keer by hul hekke uitgestap. Hy was sedert die 1980’s in die polisiediens.

Wanneer hy op sy loopbaan terugkyk, haal hy veral die oomblik uit toe ’n senior offisier hom persoonlik gekies het om by die Wes-Rand-radiobeheer te begin werk.
“Aangesien ek reeds daar gestasioneer was, het ek outomaties blitspatrolliedienste begin verrig,” vertel hy.

• LEES OOK: Blitspatrolliebeamptes tree af ná dekades se diens

Met sy jarelange diens ervaar hy steeds dat drie maande se grensdiens op ’n slag, in besonder, fisiek en geestelik baie veeleisend was.

“Oor die jare was ek betrokke by verskeie gevaarlike en hoërisikosituasies. Elkeen was uniek en uitdagend, wat dit moeilik maak om ’n spesifieke geval uit te sonder,” voeg hy by.

Die hoogtepunt van sy loopbaan was vir hom toe moord- en roofverdagtes in die Hooggeregshof skuldig bevind en swaar gevonnis is – ’n oomblik waarop hy gevoel het dat geregtigheid vir die slagoffers geskied het.

“Ek was bevoorreg om ’n ondersteunende eggenoot te hê wat die uitdagings van my werk verstaan het. Terwyl ek dikwels lang ure gewerk het, het my vrou gesorg vir gesins- en huishoudelike verantwoordelikhede,” deel hy.

Aan jong offisiere raai hy: “Die polisie is ’n roeping, nie net ’n werk nie. Jy moet opreg daar wees om ’n verskil te maak, sonder om iets terug te verwag.”

Die aftrede bring gemengde gevoelens vir hom.

“Dit is emosioneel uitdagend om te weet dat ek nie meer deel van ’n span is of my kollegas en die gemeenskap kan bystaan nie. Om in gevaarlike en stresvolle situasies saam te werk, skep ’n unieke band tussen lede wat nêrens anders herskep kan word nie, en ek sal dit opreg mis.”

Hou gerus die aftreeberigte dop van ander polisiebeamptes wat onlangs by die blitspatrollie uit diens getree het.