Noordskool trots op wêreldklas-karateprestasie
Laerskool Krugersdorp-Noord se Luandro Bornman het Suid-Afrika trots gemaak toe hy ’n indrukwekkende vyfde plek by die internasionale Karate Youth League One in die Filippyne behaal het.
Laerskool Krugersdorp-Noord spog met hul eie ‘Karate Kid’, wat onlangs op die internasionale verhoog meegeding en onder die top vyf geëindig het.
Luandro Bornman het die afgelope week na die Filippyne gereis om aan die tweede Karate Youth League One in Manila deel te neem. Noordskool-woordvoerder Quintin Botha het gesê Luandro het in die o14-kumite-afdeling vir seuns onder 50kg deelgeneem en dit as ’n ongelooflike prestasie beskryf.
LEES OOK: Five-medal haul for rising swim star Jessica Caldeira
“Luandro het uitstekend gevaar en ’n indrukwekkende vyfde plek onder top internasionale karatekas behaal. Hy het om die bronsmedalje teen ’n deelnemer van Nieu-Seeland meegeding, maar ongelukkig nét daar uitgeval,” het Quintin vertel.
Hy het verder gesê die skool is ongelooflik trots op Luandro se harde werk, deursettingsvermoë, dissipline en veggees.
“Om op hierdie vlak internasionaal deel te neem, is reeds ’n groot prestasie, en ons weet hierdie is net die begin van nog groter dinge wat voorlê,” het hy bygevoeg.
Die volgende groot uitdaging wag reeds van 2 tot 13 Oktober in Pune, Indië, waar Luandro aan die agtste World Goju-Ryu Karate Federation-kampioenskappe gaan deelneem.
“Sterkte, Luandro – ons staan agter jou elke tree van die pad,” het Quintin afgesluit.
