9 Mullies-digters blink uit op nasionale vlak
Van kreatiewe woorde tot nasionale erkenning – dié nege Mullies-leerders het bewys dat hul penne groot talent dra.
Nege jong digters van Laerskool Muldersdrif het op nasionale vlak uitgeblink nadat al nege se gedigte vir publikasie in ’n nasionale kreatiewe skryfkompetisie gekies is.
Volgens die skool se bemarker, Lindy Phaal, het al nege leerders se inskrywings in die nasionale rondte goed gevaar. Hul gedigte is onlangs vir insluiting in die amptelike e-publikasie van die skryfkompetisie gekies.
Ruben Phaal het besonder goed gevaar deur ’n algehele vierde plek nasionaal te behaal, met ’n punt tussen 85% en 90%. Dit is die tweede agtereenvolgende jaar dat Ruben onder die land se topvyf deelnemers eindig.
Die ander agt Mullies het ook hul skryftalent bewys en punte tussen 74% en 85% in die nasionale rondte behaal.
Hulle is Mignon Olivier, Lily Townsend, Jolanda van den Bosch, Joané Weideman, Juan-Cilliers Kriel, Inge Grobbelaar, Annabelle Breedt en Alexa Kieser.
Die leerders moes hul gedigte reeds teen einde Julie vir beoordeling indien. Die skool sien met trots uit na die vrystelling van die digitale bundel volgende week.