Alhoewel ons dit dalk nie altyd sal erken nie, snak die meeste van ons na ons asems wanneer ons net dink aan ‘n paar kilometer se draf. Wat dan nog van 100 kilometer in een dag!

Dit is presies wat Sameul (Sampie) Cornelius op Saterdag, 14 November van die oggend tot die aand gedoen het.

Sampie het ‘n soortgelyke uitdaging in April aangepak toe hy 72 kilometer in ‘n voortuin gedraf het om geld in te samel vir Cradle of Hope.

Omdat die spasie die vorige keer so knap was, het hy dié keer dinge vir homself makliker gemaak deur by die Run Zone West Rand-klubhuis ‘n 400 meter lange roete te draf. Hy het dit ook moeiliker gemaak omdat die afstand langer was. Die rede hoekom hy weereens sy uithouvermoë wou toets, was om iemand na aan hom uit ‘n vreeslike moeilike situasie te help.

Daar was brandstigting by hul huis en hulle het alles verloor,” het hy vertel toe hy ‘n blaaskans tydens sy drafsessie geneem het. “Dis ‘n seuntjie en ‘n dogtertjie, ‘n man en ‘n vrou in Heidelberg.”

Hy het beoog om so R20 000 in te samel want, “Dan kan hulle ten minste alles kry wat hulle wil hê. Hulle het alles verloor – beddens, klere, speelgoed, kos … alles.”

Sampie het deurentyd sy vordering met twee fiksheidshorlosies gemeet en het na 11 uur en 42 minute reeds 102,3 kilometer afgelê teen ‘n gemiddelde tempo van ses minute en 52 sekondes per kilometer. Hoewel sy hele lyf hom die volgende paar dae aan dié merkwaardige afstand herinner het, het dit gelyk of hy dit sonder veel moeite met net kort ruskansies tussenin gedoen het.

Deur die loop van die dag het vriende, familie en ander Run Zone-lede hom ondersteun, ‘n entjie saamgedraf en vir hom kos, koeldrank en ys gevat. Sy vrou en dogter het heeldag langs die baan gestaan om vir hom moed in te praat.

Sampie beplan om ‘n uitdaging soos dié twee maal ‘n jaar te doen om fondse in te samel vir verskeie liefdadigheidsorganisasies.

“Ek wil net dankie sê vir almal wat my ondersteun en gehelp het, en ook die mense wat ek nog nooit gesien het nie wat vir my koeldrank gebring het. Dankie vir die Here wat my die talent gegee het om te hardloop, en ook vir baie ander goed. Daardeur help ek mense.”