Kennies vier span-gees en wen-ervarings by eerste o.10 Krieketfees
Skole soos Lynnwood, Pridwin en Fairland het aan die eerste Kenmare o.10 Krieketfees deelgeneem. Die driedaagse gebeurtenis het jong spelers die kans gegee om hul liefde vir krieket te vier in ’n gees van sportmanskap en samehorigheid.
Laerskool Kenmare het vir die eerste keer die o.10 Krieketfees aangebied, waaraan verskeie skole tussen 16 en 18 Oktober deelgeneem het.
Die deelnemende skole was Kenmare, Fairland, Helderkruin, Pridwin Preparatory, King Edward VII Preparatory en Lynnwood.
Volgens die organiseerder van die fees, Jean van Zyl, is daar min geleenthede vir o.10-spanne om buite hul liga te speel.
“Ons het gevoel ons wil graag dié geleentheid skep en vir die kinders die fees reël. Hierdie jaar was die eerste fees, maar ons is reeds in gesprek om die skole weer vir volgende jaar se fees te nooi,” het hy gesê.
Van Zyl het bygevoeg dat die hoogtepunt vir hom was om die leerders op die veld te sien.
“Met só ’n fees is daar nie werklik ’n wenner of verloorder nie, maar eerder ’n kans vir kinders om te ontwikkel en nuwe vriendskappe te bou. Verskillende skole van regoor die provinsie kry ook die geleentheid om op nuwe velde te speel en hul talente uit te leef.”
Hy het afgesluit deur almal te bedank vir hul ondersteuning om die fees ’n sukses te maak.
