Die Noord Gauteng se Hooggeregshof het  artikels 24 en 28 van die Wet op Beheer van Vuurwapens ongrondwetlik bepaal en die parlement opdrag gegee om dié wet binne 18 maande te wysig.

Die aankondiging is deur ‘n verklaring van MJ Hood prokureurs gemaak.

Letaba Herald verneem dat wat van belang van die bevel is, is dat alle vervalle lisensies as geldig geag sal word tot tyd en wyl die parlement die nodige wysiging aangebring het.

Wat beteken dit in die praktyk?

‘Indien jou wapenlisensie verval het, kan jy nie nou vervolg word nie, indien jy reeds aangekla is omdat jou lisensie verval het, kan jy nou versoek dat die vervolging teen jou gestaak word. Dit is tans nog onduidelik presies hoe hierdie proses nou deur die SAPD bestuur gaan word.Daar sou redelikerwys verwag kon word dat die SAPD nou mense sou toelaat om vervalle lisensies te hernu of toe te laat dat sulke wapens nou verkoop word, maar totdat die SAPD amptelike opdragte in reaksie op hierdie saak uitreik, is dit bloot spekulasie. Sodra die SAPD amptelike opdragte uitreik, sal dit bekend gemaak word,’ is aan die Letaba Herald gesê.