Die inisiatief vorm deel van hulle AnkerdorpPadskou-projek waar hulle deur die maand van Julie verskeie aksies beplan om ‘n verskil in die gemeenskap te weeg te bring.

In nie minder as twee weke, is vyf stoptekens in Tzaneen gesteel, by die stop by Golden Acres, in Gilliland straat, Essenhout straat, Danie Joubert straat en Pusela straat en is volgens Derick Henning van die GTM ‘n voortsleepende probleem.

“Daar word vermoed die stoptekens word gesteel vir skrootmetaal. Om dit te vervang beloop ongeveer R1000 stuk,” het Henning gesê.

Henning het voorts vertel dat dit sy verstand te bowe gaan hoe die booswigte dit regkry. “Ons gooi sement, maar hulle steel die stoptekens met sement en al uit.” Toegee-tekens blyk glo ook in die visier van die boosdoeners te wees. Straat-naamborde word ook nog steeds gesteel, maar daar word glo nou gekyk om die straatname op die randstene te verf, ‘n inisiatief wat blykbaar vrugte afwerp in Middelburg.

Dit behoort die probleem met straat-naambord diefstal hok te slaan. ‘n Hele paar projekte word nog beplan vir die res van Julie maand in die Tzaneen omgewing.

AfriForum se #AnkerdorpPadskou is ’n veldtog waartydens hoop in dorpe landwyd geskep word deur verskeie gemeenskapsaksies wat ’n positiewe verskil maak.

‘n Skoonmaak aksie langs die treinspoor in Modjadjiskloof, Jetty 3 in Tzaneen en skoleveiligheid-oudits is waarna inwoners ook nog kan uitsien.