Sy het haar M-graad in die minimum vereiste periode by die Universiteit van Pretoria voltooi en het die fakulteit vir ekonomiese en bestuurswetenkskappe se dekaanslys gehaal. Haar tesis handel oor vroue-entrepeneurs in die trou-industrie en hoe hulle hul besighede aangepas het in die covid-19-inperkingstyd.

“Dit het vir my uitgestaan hoe almal ‘n plan gemaak het en ‘n manier gevind het om te oorleef. Die vroue se entrepeneurskap is gestimuleer deur die pandemie en het hulle planne op die kantlyn gemaak,” vertel Steenkamp. Steenkamp het self ook ‘n besigheid in die trou-industrie bedryf. Haar geleentheidsbeplanningsonderneming, Evoque Events, het sy in 2014 op die been gebring en het sy bykans elke naweek paartjies bygestaan om die groot dag perfek te maak. Sy het ook verskeie ander geleenthede gekoördineer.

Lees ook: Dreams do come true

“Ek het Evoque Events voor die pandemie verkoop, maar het in voeling gebly met dié industrie en my navorsing gedoen deur met vroue-entrepeneurs in die industrie te kommunikeer,” sê sy. Sy vertel ook dat sy kon fokus op haar M-graad en navorsing tydens die pandemie en dat die afstandsleeropsies by Tukkies haar veral gehelp het met die proses. Steenkamp het in Februarie vanjaar weer die plaaslike sakesektor betree en het Lizanzi, ‘n klereboutique in die Lifestyle-inkopiesentrum op Tzaneen oopgemaak.

Sy is ook reeds ingeskryf om haar doktorsgraad te doen in entrepeneurskap en beoog om dié graad ook in die minimum vereiste periode te voltooi. “Ek wil steeds aan die kwalitatiewe kant van entrepeneurskap navorsing doen en verder uitbrei op die vroue-entrepeneur self, haar invloed op klein besighede, werkers en die plaaslike en uitvoermarkte,” sluit Steenkamp af.