Hy staan tereg op ‘n aanklag van moord na hy op 12 Maart in hegtenis geneem is. Mulder se borgtogaansoek was susksesvol en borgtog is toegestaan op R5 000 met streng voorwaardes.
Luidens ‘n verklaring wat uitgereik is deur die Limpopo-polisie, is Mulder in hegtenis geneem vir die moord van Hannes van Dyk (59). Van Dyk is volgens die polisieverklaring deur die beskuldigde, Mulder, na ‘n argument, aangerand.Van Dyk het later aan sy beserings beswyk.

Daar word berig dat Mulder deel was van ‘n groep jong mans wat lukraak ouer mans in Phalaborwa se kuierplekke uitsonder en aanrand, ‘n speletjie wat ‘drop ‘n toppie’ genoem word. Anita Campbell, Mulder se regsverteenwoordiger, sê dat die bewerings dat haar kliënt betrokke is by ‘n groep wat ‘drop ‘n toppie’ speel slegs ongegronde gerugte is en dat haar kliënt geensins by ‘n groepaanval
betrokke was nie.

Lees ook: Phalaborwa: ‘K-word’ lady in court

Volgens Campbell het die ondersoekbeampte tydens die borgtogaansoek erken dat dit slegs gerugte is en dat hy nie tans in besit is van enige bewyse wat die bewering staaf nie. Campbell het bevestig dat Mulder weer op 8 Mei in die hof sal verskyn. Marian Potgieter, eienaar van Royal Bliss Bar, het bevestig dat die kroeg beboet is na die insident.

“Indien daar weer so ‘n oortreding is gaan hulle die plek toemaak. Die moeilikheidmakers is en bly verban,” het Potgieter verduidelik.
“Dit bly die verantwoordelikheid van die eienaars van ‘n kroeg om seker te maak dat die perseel nie ‘n broeiplek vir kriminele aktiwiteite word nie. Die polisie sal die nodige stappe teen die eienaar neem waar die insident plaasgevind het,” het brig. Malafela Mojapelo, polisiewoordvoerder gesê.