Makhoma ontvang eredoktersgraad
Piet Warren, die alombekende bees- en wildsboer van Gravelotte, het verlede Woensdag op die ouderdom van 77 jaar ‘n eredoktersgraad van die Universiteit van Suid-Afrika (Unisa) tydens ‘n gradeplegtigheid by Unisa se Muckleneuk-kampus ontvang.
Warren boer reeds vir bykans 59 jaar en is vereer met ‘n PhD in filosofie (Honoris Causa). Tydens die seremonie was die “seun van Gravelotte” emosioneel toe die skare hom minute lank toegejuig het nog voor die graad aan hom toegeken is. In ‘n verklaring wat deur Unisa vrygestel is sê hulle dat Warren erken word vir die impak op die volhoubaarheid van landbou, die opheffing van die gemeenskap en ekonomiese ontwikkeling.
Unisa voeg by dat hy ook vereer word omdat hy toekomstige generasies inspireer om volhoubare ontwikkeling en inklusiewe groei na te streef. Hy staan bekend as Mokhoma in Limpopo en Warren het diepgewortelde verbintenis met die streek. Hy praat Xitsonga vlot en het ‘n uitgebreide begrip van plaaslike kulture wat hom in staat gestel het om ‘n wesenlike verskil te maak in die lewens van veeboere, kleinboere en bestaansboere.
Lees ook: Piet Warren kry ’n eredoktorsgraad
“Sy pogings om inheemse kennis en moderne landboupraktyke te integreer is van uiterse belang in die bevordering van die Verenigde Nasies se volhoubaarheidsdoelwitte en die Afrika Unie se 2063 agenda in die streek,” verklaar Unisa. Deur gedeelde verspreiding en die skepping van ‘n werknemerstrust het Warren sy werknemers en plaaslike boere bemagtig en hul suksesse met dié van sy bedrywighede geskaar.
Hierdie benadering het nie net sy span gemotiveer om buitengewone resultate te behaal nie, maar het ook ‘n gevoel van gemeenskap en gedeelde doel bevorder. Benewens sy landbouprestasies, strek Warren se betrokkenheid vanaf die ondersteuning van plaaslike ontwikkelingsinisiatiewe tot mentorskappe.
