Na 6 jaar bring rioolpompstasie verligting vir Tzaneen
Tzaneen se rioolpompstasie is in die proses van herstel na kriminele aanklagte teen die Muni Bestuurder en sal verligting vir die omliggende gemeenskap bring.
TZANEEN –Â Dit het ses jaar en kriminele klagtes teen die munisipale bestuurder van die Groter Tzaneense Munisipaliteit geneem om een van Tzaneen se rioolprobleme uit te sorteer.
Die DA se rdl. Chrisma Bredenkamp het in April vanjaar kriminele klagtes van besoedeling van water en grond by die Tzaneen-polisiekantoor teen die munisipale bestuurder, Donald Mhangwana, gelê.
Dit het verband gehou met die vervalle rioolpompstasie wat agter Best Drive-bande in Claude Weathleystraat geleë is en daartoe gelei het dat rou riool oor Unity Primêre Skool se gronde geloop het.
‘n Sloot was vanaf die stukkende pompstasie gegrawe wat tot in rivier geloop het.
In April, toe Bredenkamp die klagtes teen Mhangwana gaan lê het, was die perseel rondom die rioolstasie nog so oorgroei dat toegang bykans onmoontlik was. Dit was gevandaliseer en die pompstasie het vir die laaste ongeveer ses jaar nie gewerk nie.
Na afloop van die klagte is ‘n gesamentlike oorsigbesoek deur die burgemeester, Gerson Molapisane, Ben van Coller van die Mopani Action Citizens-groep asook Bredenkamp gedoen.
Terwyl die dossier van die saak tans nog by die vervolgingsgesag vir besluitneming lê, is die terrein intussen skoongemaak, ‘n nuwe pompstasie gebou, en beveilig met ‘n heining en sekuriteitspersoneel.
Bredenkamp het aan die Herald gesê hoewel dit nie die enigste pompstasie is wat nie werk nie, is daar minstens vordering.
Nog ‘n groot rioolprobleem is by Jetty 3 waar riool direk in die dam ingevloei het. Sy sê volgens die huidige huurder van Jetty 3, gaan rioolopgaarhouers nou by die Jetty 3-pompstasie gesink word wat dan deur ‘n riooltrok skoongemaak sal word.
Buiten vir ander kleiner probleme, is die laaste groot probleem in die industriële area waar ‘n pompstasie nog buite werking is, sê Bredenkamp.
Volgens haar het twee WhatsApp-groepe wat uitsluitlik vir water- en rioolklagtes gebruik word, bygedra om die rioolprobleme op die dorp aan te spreek.
Sy sê daar is ‘n duidelike afname in rioolverwante klagtes wat deur volharde druk bewerkstellig is.
