Hierdie is ‘n opwindende toevoeging tot Limpopo se bergfietswedrenkalender en het gesorg vir rowwe 15km-, 35km- en 70km-roetes wat deur Kuno Venter uitgelê is vir die Tzaneen Fietsryklub.
In die 70km-uitdaging is Komborero Bere as die ‘King of the Mountain’ gekroon. Hy vat algehele eersteplek, voltooi die uitdaging in 2:56:08 en wen sodoende die mans-elite-divisie. Hy het die wedren gemaklik gewen en ‘n 20 minuut voorsprong gehad. Bill Noel vat die algehele tweedeplek met ‘n tyd van 3:16:15 en wen ook sodoende die mans-veteraankategorie.

Tyler Botha vat die derdeplek met ‘n tyd van 3:23:56. Shani Rudder wen die prys vir die “Queen of the Mountain” met ‘n tyd van 04:12:31 en vat die topplek op die podium in die vroue-afdeling. Meesterryer, Louwrina Dando vat tweedeplek in die vroue-afdeling met ‘n tyd van 4:24:10.
In die 35km-resies het Henro van der Walt die algehele eersteplek verwerf met ‘n tyd van 1:42:12 en wen hy ook die sub-junior afdeling met dié tyd. Gordon Noel vat algehele tweedeplek met ‘n tyd van 1:42:43 en wen ook die sub-junior divisie.

Lees ook: Tzaneense fietsryers geniet Sani2C-uitdaging

Edrich Lourens vat die algehele derdeplek met ‘n tyd van 1:42:55. Hy wen ook die mans junior afdeling met die tyd.
Anke Rood is die eerste vrou oor die eindstreep in de 35km-uitdaging en wen die resies met ‘n tyd van 1:58:34. Sy wen ook die vroue-jeugafdeling met dié tyd. Elisma Luus is die tweede vrou oor die eindstreep en wen sodoende die sub-veteraankategorie met ‘n tyd van 2:05:06.
In die 15km-uitdaging het die jongspan met die louere weggestap. Marlo van der Walt het die algehele eersteplek en die topposisie in die Sprogs-divisie geneem en voltooi die roete in 33:12.

Ferdie Viviers vat die tweedeplek met ‘n tyd van 35:30 gevolg deur Aron van den Borre wat die algehele derdeplek in die resies vat. Viviers wen die sub-junior afdeling en Van den Borre wen met sy tyd van 35:33 die Nippers-afdeling. Leila van Wyngaardt is die eerste dogter om die resies te voltooi en wen ook met haar tyd van 40:43 die Sprogs-dogtersdivisie.
Byna 200 fietsryers het deelgeneem en organiseerders bedank graag hulle hoofborge, Miami Canners en BF Petroleum Groep vir hulle ondersteuning.

Stanley Thompson het tydens die prysuitdeling gesê: “Ek het nie gedink daar is ‘n bergfietsuitdaging hier wat harder as die Akkedis is nie, maar dié roete is.”