Hoërskool Merensky se o.15-, o.16- en eersterugbyspanne, het uitgedraf vir die finale ligawedstryde in afdeling 2 van Limpopo Hoërskole Rugby.
Die atmosfeer op Plasiepark was elektries toe die o.14-spanne van Hoërskole Ben Viljoen en Ellisras die dag ingelei het. Die wedstryd was redelik gelykop, met Ben Viljoen se spelers wat ná die sirene deurgebreek het om die wedstryd met 13-8 te wen.
Daarna het die Plasies se o.15-span opgedraf teen Hoërskool Ellisras. Die wedstryd was spannend, en danksy JD Boshoff se vier suksesvolle strafskopppe kon die Plasies met ‘n eindtelling van 12-10 seëvierend van die veld stap. Boshoff het ook die speler van die wedstryd toekenning ontvang.

Die o.16’s se wedstryd, ook teen Hoërskool Ellisras, het gesorg vir aanskoulike hardlooprugby. Die telbord was aanvanklik in die guns van Hoërskool Merensky, maar die Rassies het verbete teruggeveg en die telling het wipplank gery.
Die Rassies het in die doodsnikke van die wedstryd punte aangeteken om die wedstryd met ‘n eindtelling van 37-36 te wen.
‘Kliphard!’ Dit is een woord wat die hoofwedstryd van die dag tussen die eerstespanne van Hoërskole Merensky en Frikkie Meyer kan opsom. Frikkie Meyer het vroeg in die wedstryd die eerste punte aangeteken met ‘n drie wat verdoel is.

Also read: Plasie-rugby wys hulle staal in Landbouskole-toernooi

Daarna het Plasieland se Neil van Vuuren met ‘n strafskop geslaag, maar moes ongelukkig die veld kort daarna verlaat met ‘n heupbesering. Reese Coetzee se skopskoen was gelukkig fyn ingestel en het met nog ‘n strafskop tussen die pale deurgestuur om die rustydtelling 6-7 te maak.
Na ‘n onverdoelde drie, was Frikkie Meyer voor met 12-6, en die spanning langs die veld het hoog geloop.
Vanaf die pawiljoene is die Plasie-manne luid aangemoedig, en het Nyakala Sethaba oorgeduik vir ‘n drie wat weer deur Coetzee verdoel is, om die telling op 13-12 te staan te bring.

Goeie hantering en nuwe begeestering het in die laaste minuut gesorg dat Clifford Ledwaba in die hoekie kon oorduik, met ‘n verdoelskop deur Coetzee om die wentelling van 20-12 in die blou sakkie toe te knoop. Agtsteman, Waldie Haasbroek is as die speler van die wedstryd aangewys.
Nog is dit het einde niet, en speel al vier Plasieland se A-spanne op 30 Julie op hulle tuisveld by Plasiepark in die Noordvaal-uitspele. Die o.14’s en o.16’s meet kragte teen hulle eweknieë van Hoërskool Randburg, terwyl die o.15A’s en eerstespan teen Leeuwenhof Akademie se spanne te staan sal kom.