TZANEEN: Gholfers pak ‘Revenge’ so braai-braai aan
Met 'n braaier gemonteer voor aan ‘n gholfkarretjie, ‘n baan vol hindernisse, setperke sonder putjies en lekker gees onder plaaslike gholfers.
Dit is hoe die jaarlikse ‘Greenkeepers Revenge’ in die spreekwoordelike gholfsak opgesom kan word.
Die uitdaging is die afgelope naweek aangebied te Tzaneen Gholf Klub (LCC). 61 Geesdriftige gholfspelers het die gholfuitdaging van die baaninstandhoudingsbeampte, HJ van Jaarsveld met albei hande, gholfstok en -bal aangegryp met verskeie hindernisse wat onverwags op die baan vir die spelers gewag het.
Die gholfspelers het die spel en uitdaging aangedurf en moes deur die loop van die dag verrassend agterkom dat sommige setperke geen putjie gehad het nie.
Indien ‘n speler sy naam op een van die naaste aan die pen bordjie sou skryf, was ‘n boete aan die orde van die dag.
Lees: GALLERY: Chris Muller Gholfdag trek vol veld
Daar is ook met die telkaarte gepeuter deur die geheimsinnige Van Jaarsveld, wat die aantal sethoue verander het by verskeie putjies. Putjie nommer 6 was dan ook ‘n oase met yskoue verversings, maar (on)gelukkig net vir die caddies.
Die gholfkarretjie van Willie McCallaghan en Van Jaarsveld was die middelpunt van bespreking en het baie aandag geniet.
‘n Braaier is gemonteer voor aan die gholfkarretjie en daar is ‘n vleisie oor die kole gebraai by putjies nommer 9 en 18. Hulle was ook slaggereed met ‘n noodhulpkissie aan boord.
Lees: Jaarlikse gholf in herinnering aan Chris Muller terdeë geniet
Die gelukkige trekking wenners was as volg: Megan Bissett, Zander du Toit, Biebie Warren Olive Evens, Andrew Mafa, Richard Mathebula, Daniel Conradie en Shaun Conradie. Die dag was uiters suksesvol en is terdeë deur almal geniet.
