Letaba Rugbyklub het Saterdag, 19 mei die gewigtige taak gehad om die verdedigende kampioene en voorlopers in die liga, Northam, in modderige, nat toestande aan te vat en hoewel die tuisspan moedig probeer, het was Northam op die dag beter in al die kragmetings.

Rustyd was Letaba se eerstespan nog sterk in die prentjie en hoewel Northam met 13-0 voorgeloop het, het die eerste 40 minute baie gelykop verloop en kon die telling maklik in Letaba se guns geswaai het. ‘n Gebrek aan dissipline in die tweede helfte het die Groentruie egter duur te staan gekom.

Een rooikaart en twee geelkaarte vir die tuisspan het die wedstryd op ‘n skinkbord aan die besoekers oorhandig en die eindtelling van 34-5 in Northam se guns vertel ‘n storie van hoe die kampioene oor ‘n verswakte span beheer geneem het.

Letaba se tweedespan het die soveelste puik vertoning van die seisoen gelewer en aanvallende, aanskoulike rugby gespeel met effektiewe dryfmaal bewegings wat die besoekers beslis ‘n baie harder wedstryd gegee het as wat hulle verwag het.

Uiteindelik wen Northam naelskraap met 19-17, maar Letaba se naasbestes het met baie eer uit die stryd getree en met ‘n bietjie geluk kon hulle as oorwinnaars van die veld gestap het. Letaba se derdespan het met 28-12 verloor in ‘n wedsrryd wat ‘n goeie voorgereg was oir die goeie rutgby wat later die middag gespeel is.

Na die wedstryd het Northam se bestuurspan erken dat aldrie kragmetings baie moeiliker was as wat hulle verwag het en as Letaba sy dissipline opknap, bietjie minder foute began en belowende bewegings afrond kan hulle gewis later die seisoen die kampioene verras.

Namens Letaba het Bennie Kruger, voorsitter, al die toeskouers bedank wat ondanks die trietsige toestande die Groentruie kom ondersteun het. “Sonder julle is daar nie ‘n klub nie”, het Kruger gesê.