Letaba Rugbyklub se eerstespan het verlede Saterdag hier sy rieme styf geloop in ‘n vriendskaplike wedstryd teen Louis Trichardt – een van die spanne wat hy binnekort in die amptelike liga die stryd moet aansê.

Louis Trichardt het die naelbyter met 22-21 gewen en die uitslag kon baie maklik anders gewees het.

Vir die soveelste wedstryd na mekaar vanjaar moet Letaba se spelers hand in eie boesem steek met die besef dat beter afronding en ondersteuning maklik op ‘n oorwinning kon uitloop. Met soveel talent in die agterlyn en ‘n baie gewillige agttal is daar genoeg geleenthede vir Letaba om drieë te druk.

Ongelukkig loop ‘n groot persentasie bewegings skipbreuk weens oorhaastigheid of gebrekkige hantering.

Dit kan nog reggestel word voor die liga begin en die manne behoort mekaar nou reeds beter te verstaan as wat hul vertonings weerspieël.

Die tweedespan, in teenstelling met hul seniors, het ‘n puik vertoning gelewer en Louis Ttichardt ‘n deeglike pak slae gegee en met 31-0 gewen.

Die derdespan het Nkowankowa met 35-5 verslaan. Louis Trichardt het hierheen gereis nadat Witrvier kop uitgetrek het.

Letaba kom vandag, Saterdag 6 April in Drakensig op Hoedspruit in die nie-amptelike hoofwedtryd teen die gashere, die Hoedspruit Pumbas, te staan.

Die Pumbas vier die naweek hul 75ste bestaansjaar en die wedtsryd vorm deel van ‘n program vol rugby vir die hele dag.