Koevoetbende slaan toe

Die Van der Lindes se huis in Selatistraat (Aerorand Wes) was eerste op hul breeklysie Vrydagmiddag omstreeks 12:20. Die palissadehek is van die spoor afgetel en die veiligheidshek met geweld met ‘n koevoet oopgebreek.

Me. Toy Korff bly agter op die perseel en het die honde hoor blaf. Sy is die huis in om te gaan kyk wat aangaan, maar toe sy deur die venster kyk, het sy gesien die veiligheidsdeur is reeds af.

Sy het omgespring om die radiogroep te probeer kontak, maar die drie rowers het teen dié tyd reeds die deur afgebreek en haar oorval. ‘n Duvet is oor haar kop gegooi en sy is eers op die sitkamerbank gegooi.

Daarna het hulle haar saamgesleep kamer toe, waar sy gedwing is om op die grond te lê. Al die kaste is oopgeruk, waarop die aanvallers ‘n los kluis, waarin kontant en juwele was, gebuit het.

Me. Korff is deur die rowers in die kamer toegesluit en die deur moes later oopgeskop word om haar te bevry.

• Die groep het net ‘n entjie verder afbeweeg in Selatistraat en omstreeks 13:00 hul koevoet gebruik om deure oop te breek by mnr. Chris van Noordt se huis.

Die motorhuisdeur, veiligheidshek tussen die motorhuis en huis, asook die huis se veiligheids- en voordeur is met die koevoet oopgebreek.

Mnr. Van Noordt se pa, Piet, sê hy is nie seker wat alles gesteel is nie, aangesien Chris tans in Engeland is. Op hierdie stadium lyk dit vir hulle of daar ‘n televisie, rekenaartoerusting en klerasie weg is. Al die kasdeure was oop toe hulle daar aankom.

• Omstreeks 03:00 Saterdagoggend is dr. Pieter Bothma (veearts) gewek deur sy alarm in Eeufeestraat (Clubville). Toe hy ondersoek gaan instel, het hy ‘n verdagte in sy gang opgemerk. Die booswig het vir hom geskrik, omgespring en deur die venster gevlug, waar hy ingekom het. Die sitkamervenster is oopgebreek en die diefwering afgebreek. ‘n Skootrekenaar word vermis.

• Dr. Bothma se pa, Hennie, bly net agter hom in Hospitaalweg en vertel dat hy en sy vrou omstreeks 09:30 na Hoërskool Middelburg is om te gaan kyk hoe hul kleinseun, Malan, rugby speel.

Toe hulle tuiskom, omstreeks 12:00, was dit duidelik dat die koevoetbende ook hier toegeslaan het.

Die veiligheidshek- en agterdeur is oopgebreek, daarna is die veiligheidshek in die gang én voor hul kamer oopforseer.

Mnr. Bothma sê die inbrekers het weggekom met hul digitale kamera en van sy vrou se juwele. Die inbrekers het gesit en al die egte juwele uitgesoek! “My vrou se egte pêrels wat ons in die Ooste gekoop het, is onder die juwele wat gesteel is!”

• Die groep is van daar af na Leipoldtstraat (Gholfsig) waar hulle omstreeks 13:00 me. Marie Godfrey se deure oopgebreek het. By haar huis is ‘n televisiestel gevat. Die vermoede bestaan dat hulle nie lus was om verder te sukkel nie, aangesien al die kasdeure in die huis gesluit was!

• ‘n Klein rukkie later het die groep weer in Leipoldtstraat probeer toeslaan by die Sindisa Gastehuis van mnr. John Miller. Volgens mnr. Miller was die bestuurder van die gastehuis daar en het hulle oor die muur sien spring. Die radiogroep is dadelik geroep, maar die booswigte het snuf in die neus gekry en net weer oor die muur gespring en laat spaander.

In bykans al die gevalle was die radiogroep en polisie binne minute op die toneel, maar elke keer was die inbrekers hulle net een treetjie voor.

“Ons almal noem hulle nou al die “hit and run” koevoetbende! Want hulle kom met spoed in, omdat hulle weet van die alarms en radiogroepe, gryp wat hulle kan, en gee pad!” het mnr. Hennie Bothma gesê.