Opvolg: Brigadier ondervra joernaliste
Die provinsiale polisiekommissaris, luitenant generaal Thulani Ntobela, laat nie gras onder sy voete laat groei met die ondersoek na die gebeure op die N4 waar 'n polisiekonvooi voorverlede week 'n ambulans se pad versper het nie.
Die Observer is Dinsdag besoek deur brigadier Rudolph Adolph wat aangestel is om talle senior polisieoffisiere vir wangedrag te ondersoek nadat hulle ‘n baan, wat spesiaal vir die ambulans met groot moeite oopgemaak is, versper het.
Pleidooie dat die konvooi net wag dat die ambulans met die kritiek beseerde Bernine Booysen agterin kan deurkom, is doodgeblaf met “ons is die polisie, ons is in beheer”.
Vyf ander mense het op die toneel verkool en die groot vraag wat beantwoord moet word in die ondersoek is, hoekom is die pad nie gesluit nie?
Toe die ambulans wou jaag Middelburg toe, was al vier aankomende bane deur verkeer geblok.
‘n Baan is met groot moeite oopgemaak vir die ambulans maar die polisie se konvooi, waarin die plaaslike stasiebevelvoerder ook was, het by die baan ingeglip en botweg geweier om te skuif.
Die polisie is oor die aardbol heen gekritiseer vir die optrede wat op Observer se internet platforms aan die klok gehang is.
Verklarings is Dinsdag by twee Observer joernaliste op die toneel geneem en by die dossier gevoeg.
Die polisie se konvooi was oppad na die toneel. Daar word beweer dat ‘n Lexus, wat deel daarvan uitgemaak het, die agterhoede gedek het om te keer dat die baan nie geblokkeer word nie.
