Teken solank 24 April 2027 in julle dagboeke aan! Hoërskool Middelburg het sy rugbybepalings vir volgende jaar bekend gemaak en die eerste kragmeting in die Virsekerbeker Noordvaalreeks is teen sy ou Laeveldse teenstanders, Nelspruit.

Daar kon nie vir ’n meer interessante afskop in die liga gevra word nie.

Nelspruit speel die eerste keer in die bekerafdeling van die reeks terwyl dit Middies se tweede jaar tussen die groot kanonne is.
Nog ’n datum om in rooi te omkring, is 8 Mei 2027 wanneer die jaarlikse derby weg teen HTS Middelburg plaasvind.

Omdat die Rooies volgende jaar hulle honderdjarige bestaan vier, gaan dit ’n spesiale geleentheid wees.

Na die kragmeting tuis teen Nelspruit speel die span in groen vir twee naweke weg in die liga teen Menlopark en Rustenburg, voor die volgende tuiswedstryd op 29 Mei teen Waterkloof.