Mev. Roos sê dat dit voor haar ouers se huis gebeur het. Nadat hulle ’n foto geneem het is hulle die huis in, omdat haar tweejarige dogtertjie begin bang word het. Toe hulle weer na buite is was albei slange weg.

Plaaslike slangkenner, Victor Boshoff, sê dat dit ’n mosambiekse spoegkobra en ’n bruin huisslang is. Mosambiekse spoegkobras is bekend dat hulle ander slange vreet. Bruin huisslange is skadeloos, maar hierdie een het daarin geslaag om die spoegkobra in ’n wurggreep beet te kry.

Dit lyk ook asof die spoegkobra daarin geslaag het om die huisslang te byt, wat sy gewisse dood sou veroorsaak.

Mnr. Boshoff sê dat daar ’n moontlikheid bestaan dat die spoegkobra ook kon vrek as sy gif nie vinnig genoeg intree nie.

Die feit dat albei slange weg was toe mev. Roos weer na buite is, dui daarop dat die spoegkobra tog daarin geslaag het om sy prooi te dood en te verorber.