Walk for Johlene-projek verloop nog vlot
Lt.kol. Anton Crafford en sy medestappers, wat van Bloemfontein na Kaapstad stap vir die Walk for Johlene-projek ten bate van Kansa, is nog hard aan die loop.
“Sover gaan dit goed. Ons stap elke môre so van half sewe se kant af en die oggende begin bietjie koel word, maar die gees bly wonderlik.”
Ten spyte van ’n paar pleisters en salfies vir die blase, sê lt.kol. Anton Crafford dat hulle baie geseënd is.
“Ons is baie bevoorreg en dankbaar vir die mense se ondersteuning, en ook vir al die skenkings wat ons ontvang het. Al die geld word aan Kansa geskenk en daar het darem al ’n hele paar groot bedrae ingekom.”
Die manne se staproete vir dié week lyk soos volg:
Maandag, 4 April 2016 – begin by Colesberg en stap 37 km tot 37 km anderkant Colesberg
Dinsdag, 5 April 2016 – begin van anderkant Colesberg en stap 37 km tot by Hanover
Woensdag, 6 April 2016 – begin by Hanover en stap 40 km tot 40 km anderkant Hanover
Donderdag, 7 April 2016 – begin van anderkant Hanover en stap 37 km tot 15 km anderkant Richmond
Vrydag, 8 April 2016 – begin van anderkant Richmond en stap 40 km tot 50 km voor Drie Susters
Saterdag, 9 April 2016 – begin van voor Drie Susters en stap 37 km tot 13 km voor Drie Susters
Sondag, 10 April 2016 – begin van voor Drie Susters en stap 38 km tot 25 km anderkant Drie Susters
Besoek gerus hulle Facebookblad, ‘Walk for Johlene – Bloemfontein to Cape Town’, om hulle projek te volg en ondersteun of donasies te maak wat direk aan Kansa sal gaan.
