Twee weke se soeke en oproep aan Suid-Afrika om Middelburg se geliefde boemelaar, Johnny Bosman, op te spoor, het op ’n doodloopstraat uitgeloop.
Johnny het drie jaar gelede die langpad gevat na warmer weivelde en is ’n tyd lank op Richardsbaai gesien.
Maar toe verdwyn Johnny soos mis voor die son – weg!
Sy rugsak met Bybel is later by die Swaziland grenspos gekry.
Daar was ook gerugte van ’n hawelose wat dood in bosse op Richardsbaai gekry is.
’n Oud Middelburger, Hannetjie van der Merwe, wat deesdae op St Lucia bly, het maande gelede laat weet dat sy Johnny op ’n keer gesien het, waar hy in Richardsbaai se strate ronddwaal.
Twee weke gelede het www.mobserver die land gevra om asseblief te help soek na ons dorp se Johnny.
Susan van Vuuren het gesê hy is in Secunda. “My suster gee Vrydagaande vir boemelaars kos en hy is gereeld daar. Hy was blykbaar vir ’n ruk by die see, maar hy is terug in Secunda.”
Maar Susan of haar suster het nie weer van hulle laat hoor nie.
En nou wonder die land steeds of Johnny nog iewers rondswerf of…
Sy broer in Pretoria, Johan, sê dat Johnny darem so eenkeer per jaar van hom laat hoor het.
Maar dit is nou reeds drie jaar waar daar geen taal of tyding van hom is nie.
Johan vra dat hy by 082 320 5475 gebel word of maak kontak met Daleen Naude by 013 2431434 of daleen@mobserver.co.za.
