NewsUpdate

So lyk mooi jong mense wat deur dwelmdraak vernietig is

Die soveelste dwelmslaaf het aan sy einde gekom in die strate van Middelburg...vir almal om te sien.

November 1, 2016

Jana Boshoff 1 minute read

Nog ’n dwelmslaaf is dood aangetref op ’n sypaadjie in Middelburg.

JP Gouws se maer en uitgeteerde lyf is leweloos op ’n sypaadjie gevind, om hom was ’n plas bloed. Hy is die derde jong man wat in die openbaar dood is as gevolg van dwelms.

JP is voor sy dood aangerand en het ook van ’n bakkie afgeval.

•Edmund Doubell is in Maart in ’n badkamer by die Middelburg Mall gekry. Dit is later bevestig dat hy aan ’n dwelmoordosis gesterf het.

•Shaun Saunders is ’n paar maande later, in Julie, in ’n toilethokkie in die Oaks Sentrum in die middedorp gevind. Ook hy is aan ’n oordosis dood.

Al drie jong mans was verslaaf aan heroïne. Hul liggame is soos rommel opgetel, op ’n publieke badkamervloer, op ’n sypaadjie, vir die wêreld om te sien, en tien teen een verby ’n dwelmhandelaar of twee gedra.

Die polisie se dwelmarrestasies, wat amper lagwekkend sou wees as die gevolge daarvan nie so tragies was nie, bestaan meestal uit besit van dagga.

Een van die beskuldigdes getuig in die hof hoe hy voor die handelaar gearresteer word kort nadat die transaksie voltooi is. Die handelaar stap weg en hy gaan sit alleen in die tronk. Net om later skuld te erken en met ’n R300 boete oor die vingers getik te word. Dit betaal nie eers die elektrisiteit wat nodig is om sy saak te prossesseer nie.

Buiten vir die drie gevalle hierdie jaar, is daar oor die jare ’n ewiggroeiende lys van jongmense wat hul laaste asems uitblaas as gevolg van die dwelmhel waarin hulle vasgevang is.