News

Tweespalt oor geskeurde hemp

’n Dronk wag, ’n geskeurde hemp en ’n gevattery, het tot twis gelei tussen Hawk Sekuriteit en ’n verloofde paartjie.

January 11, 2019

Gerhard Rheeder 2 minutes read

Mnr. Pieter Buys wys hoe ’n sekuriteitswag sy verloofde, Elmarie da Silva in November in Clicks se parkeerterrein betas en rondgepluk het. Die betrokke wag is later afgedank.

Mnr. Pieter Buys en sy verloofde, Elmarie da Silva, sê dat hulle in die Clicks parkeerterrein by die Oaks Sentrum was en uit die bloute deur ’n sekuriteitswag van Hawk genader is.
Die wag was glo ooglopend dronk en het “spontaan” met die paartjie begin praat oor moontlike werk vir mnr. Buys.

Toe die twee later terugkeer om met die wag se skofbaas te gesels oor die werk, het die wag wie se naam aan die Observer bekend is, skielik begin om me. Da Silva te begin betas “oor haar boude en borste”.

Toe mnr. Buys tussenbeide wou tree, is sy Jeep hemp na bewering van sy lyf afgeskeur.

Die paartjie het Hawk geskakel, waarna die skofbaas daar aangekom het. Die wag is dieselfde dag summier afgedank weens die maatskappy se streng anti-drank beleid, het Hawk bevestig.
Maandag was die paartjie by die maatskappy waar hulle beweer hulle “gesmeek is” om nie ’n klag by die polisie te gaan lê nie.

Die maatskappy het glo onderneem om die hemp te vervang. Mnr. Buys sê hy het kwotasies vir die hemp op meer as een geleentheid gaan inhandig maar dat Hawk nog nie die R550 hemp vervang het nie.

Ander wagte in diens van Hawk vertel dat hulle gesien het hoe die paartjie saam gedrink het. Die getuies ontken ook dat daar ’n fisiese geveg tussen die partye was.

Hawk sê dat hulle die paartjie beslis aangemoedig het om die saak by die polisie aan te meld.

Hawk Sekuriteit eienaar, mnr. Stefan Bezuidenhout, sê dat die storie bietjie dik vir ’n daalder is – “hoekom sal die wag uit die bloute net met die mense begin gesels en beloftes van werk maak?” vra hy.

Hy moedig die paartjie steeds aan om die polisie te nader.