News

Berugte polisieman word weer ondersoek na meisie se klagtes

Kapt. Awie Geldenhuys, die polisieman wat ondersoek word in verband met die dood van ’n meisie in Januarie is sedertdien met siekverlof.

April 1, 2019

Daleen Naudè 1 minute read

Maryka Kleinhans (31) is dood nadat sy glo uit Geldenhuys se voertuig gespring of geval het. Nou beweer ’n kroegmeisie van Tracers, Tarryn Meikeljohn (36), dat hy haar aangerand het toe hy haar ’n geleentheid aangebied het na haar Dennesig huis toe.

Hy het haar glo onder andere met die vuis geslaan. Nadat hy haar glo betas het, het Meikeljohn klagtes van aanranding en seksuele aanranding teen Geldenhuys by die polisie aanhangig gemaak.

Alhoewel die Onafhanklike Polisie Klagte Direktoraat by monde van hul woordvoerder, Moses Dlamini, gesê het dat dié klagtes nie eintlik in hul mandaat val nie, is verneem dat hulle wel die ondersoek by die polisie wil oorneem. Opod ondersoek reeds die Januarie voorval.

Brig. Leonard Hlati (provinsiale mediawoordvoerder) kon nie bevestig of dissiplinêre stappe teen Geldenhuys gedoen gaan word nie.
Daar is wel by ’n betroubare bron bevestig dat ’n interne ondersoek geloods is.

Die beserings aan die kroegmeisie se arms, wat beweer dat sy deur kapt. Geldenhuys aangerand is. Haar pols is blou en daar is duidelik krapmerke op haar arms.

Geldenhuys is steeds met verlengde siekverlof.

Die beweerde voorval het meer as ’n week gelede plaasgevind, maar kapt. Geldenhuys is nie gearresteer of aangekla nie.

•www.mobserver.co.za het vanoggend herhaaldelik met kapt. Geldenhuys probeer kontak maak om hom die kans te gun om kommentaar te lewer op die aantygings teen hom. Sy selfoon het gelui, maar hy het nie geantwoord nie.