Na wat verneem word was die kleuter van sowat vier jaar oud, een van die nege insittendes in ‘n Toyota bakkie wat in die rigting van Nelspruit gery het.

Daar is aanvanklik gedink dat ‘n voertuig gegly het vanaf die oorkantste baan en die bakkie getref het, maar die voertuig was in dieselfde rigting onderweg en het gegly en die bakkie getref.

Die kleuter is op die toneel dood verklaar en is ten minste sewe ander pasiënte ook met Watco en Hi Tech Ambulansdienste hospitaal toe vervoer.

Twee volwassenes het dieselfde nag aan hul beserings beswyk in die Middelburg Hosptaal.

• In dieselfde tyd wat nooddienste op hierdie toneel was, is daar net ‘n entjie verder, regoor die Middelburgdam, ‘n voetganger doodgery.
• ‘n Klein rukkie later is nog ‘n voetganger doodgery op die Vandyksdrifpad. Die trok wat hom doodgery het, het nie gestop nie.
• Daar was laasnag ook twee ongelukke in die dorp.
• ‘n Citroen het kort na middernag in Cowen Ntulistraat naby die ingang van die Amora Dierepark gerol. Die jong man wat bestuur het, het weens skok weg gehardloop, maar is kort daarna gevind. Hy het ernstige beserings opgedoen.
• Vanoggend omstreeks 01:30 was daar ‘n ongeluk op die hoek van Samora Machel- en Kogelstraat waar ‘n VW Polo en ‘n Hilux bakkie mekaar getref het. Buiten snye en skok, het niemand ernstige beserings opgedoen nie.