Ruan Marx (18) se passasiersdeur is só vinnig oopgeruk, dat hy nooit gesien het hoe die rower lyk nie.

“Daar was niks geld in die beursie nie en sy selfoon is geblok. So hulle kan niks daarmee doen, buiten dat hulle vir ons ongerief veroorsaak het om nou weer sy lisensie en identiteitsdokumente oor te laat doen!” het sy ma, Rika, vanoggend omgekrap gesê.

Ruan het omstreeks 14:30 by die verkeerslig op die hoek van Walter Sisulu- en SADCstraat by ’n rooi verkeerslig gestop.

Die volgende oomblik het hy in sy truspieëltjie gesien daar staan iemand agter in die middel van die Ford Ranger se kappie.

Dieselfde tyd het daar skielik ’n man by die bestuurderskant se venster gestaan en hy het probeer om die deure te sluit, sodat die man nie sy deur kan ooppluk nie.

Voor hy die sluitknoppie kon druk, het die passasiersdeur oopgevlieg en het ’n persoon binne sekondes sy beursie met kaarte in, asook selfoon gegryp. Die beursie en selfoon was tussen die twee sitplekke en hy kon nie glo dat die booswig só vinnig dit kon sien en dit kon gryp nie.

Teen dié tyd het was die lig reeds groen en moes hy gou die deur behoorlik toemaak dat hy verder kon ry.

As enige persoon dalk Ruan se ID of lisensie optel, bel me. Marx by 076 544 9526.

•Met hul aankoms by die polisiestasie, het daar ’n man met twee jong kinders ook in die ry gewag om ’n roofklagte oop te maak.

Hy het vir me. Marx vertel dat die rowers nie eers omgegee het dat sy kinders, wat me. Marx tussen ses en agt jaar geskat het, by hom was nie.
Die man, wat in die Middedorp geloop het, is ook van sy beursie en kaarte beroof.