Nuwe inligting het volgens die staat aan die lig gekom wat Nel se borg moontlik in die wiele kan ry.
Wat die sensitiewe inligting is, wou die aanklaer in die opspraakwekkende moordsaak nie sê nie.

Nel word daarvan verdink dat hy sy transseksuele vriendin tydens ’n nag van erge dwelmmisbruik met ’n instrument verwurg het.

Die Taiwanees se liggaam is deur ’n huisvriend van Nel langs hom in die bed gekry.
Nel was egter bewusteloos en daar is gesukkel om hom by te bring

Hy kon niks van die aand se gebeure onthou nie en sy familie sê sy geheue is steeds vaag.

Die huisvriend van Nel is soos hy ook ’n voormalige rugbyspeler.

Tydens ’n hartroerende onderhoud met Nel se broer, Tobie, het hy gesê die familie was onbewus van die erns van sy dwelmverslawing en dat Nel, wat op ’n stadium deur sy ouers ingeneem is, gesê het dat hy net dagga gebruik.

Lees ook:

Dwelmsmouse sal nie ophou voor tronkdeure toeklap of kisdeksel toesak

Hy kon sy ouers daarvan oortuig om hom te laat terug gaan Pretoria toe waar hy ’n swembadbesigheid bedryf het.

Die familie het die oorledene wel ontmoet en sê dat hulle kon sien dat die vrou “manlike kenmerke getoon het, byvoorbeeld ’n groter, meer gespierde liggaamsbou.”
Hulle vermoed dat die verhouding floreer het omdat die Taiwanees, Nel met die hoogverslawende dwelmmiddel Tik voorsien het.

Die familie sê dat die oorledene ook glo onkleedanse gedoen het voor die ontmoeting met Nel.

Nel is aanvanklik na sy arrestasie vir moord verwys vir sielkundige waarneming.
Hy is al bykans drie jaar agter tralies in aanhouding.

Die familie sê dat daar nie geld is vir ’n private regsverteenwoordiger nie en dat Nel tans steun op staatsregshulp.

Sy verhoor sal in September afskop.