Bagasiebakmoord: drie nog ’n naweek agter tralies
Die drie beskuldigdes in die “bagasiebakmoord” gaan nog ’n naweek agter tralies deurbring.
Die saak is uitgestel na volgende week vir die voortsetting van hulle borgaansoek.
Jan Jordaan (beskuldigde twee) word aangekla van moord en Angelique (Angie) Appelgryn (beskuldigde drie) en Alex Grobler (beskuldigde een) van onder andere regsverydeling.
Die ondersoekbeampte, sers. Osia Banze, het tot laat gistermiddag getuig waarom hy borg teenstaan.
Die slagoffer, Danie Maritz (27), is na bewering eers met ’n mes gesteek en daarna is sy keel afgesny.
Lees volledige berig hier:
https://www.citizen.co.za/middelburg-observer/news/2023/11/23/lyk-in-bagasiebak-beskuldigdes-is-harteloos-en-gevaarlik/
Adv. Petrus Ntuli, wat optree vir die beskuldigdes het sersant Banze aangespreek en gesê dit is onregverdig om te sê sy kliënte is “harteloos” en “die vrot aartappels in die gemeenskap.”
Hy het gesê dat sers. Banze eers op 21 November die dossier gekry het en dat hy nie self die saak ondersoek het nie, maar getuig oor wat hy in ’n dossier gelees het.
Volgens hom, het sers. Banze nie eers geweet dat sy kliënte aangerand is om verklarings af te lê nie.
Sers. Banze het gesê dat hy geen rede het om sy kollegas van die Vosman polisie se verklarings in twyfel te trek nie.
Tydens die hofverrigtinge het landdros Christa Pohl vir sers. Banze gevra of die vierde verdagte, wat op hierdie stadium net ‘Kobus’ genoem is, in al die getuienis, moontlik binnekort gearresteer gaan word.
Sers. Banze wou egter nie op hierdie stadium amptelik in die hof uitbrei oor hul ondersoek nie, maar wel gesê dat hulle alle inligting opvolg.
• Daar word op Facebook ’n foto rondgestuur met die woorde: “Wanted” daarby van die persoon na wie gesoek word. Dit kan egter nie op hierdie tydstip gebruik word nie, omdat die polisie nog geen foto’s of inligting uitgestuur het dat daar na ’n spesifieke persoon gesoek word nie.
