’n Vrou en drie mans wat aangekla is na die moord op Danie Maritz, wat in die bagasiebak van ’n uitgebrande voertuig gekry is, het Vrydag weer in die hof verskyn.

Danie is tussen die nag van 15 November en die vroeë oggendure van 16 November by ’n skrootmetaal besigheid in Middelburg vermoor.

Sy oorskot is daarna in die bagasiebak van Angie Appelgryn se voertuig gelaai en daarmee gery tot naby ’n myn in Clewer, waar dit aan die brand gesteek is.

Grobler, Appelgryn en Jordaan is kort na die moord gearresteer en Pretorius het homself, nadat die ander drie se borgverhoor reeds afgehandel is, aan die polisie oorgegee.

Pretorius en Jordaan word van die moord beskuldig en die klagtes teen Grobler en Appelgryn is rakende die gebeure waar Danie se oorskot verwyder is van die toneel en die voertuig, met hom nog daarin, aan die brand gesteek is.

Jordaan en Pretorius is steeds in aanhouding en Appelgryn en Grobler het tydens een van hul vorige verskynings reeds borg gekry.

• Pretorius se saak is uitgestel na volgende week vir borgverhoor. Alvier sal weer in November voorkom.