Twee honde het gevrek en een is nog by die veearts nadat boosdoeners gif in ‘n erf gegooi het.

Die “Operation Poisoning’ WhatsApp-groep het laat weet dat drie honde in Jasmynstraat (Kanonkop) gif ingekry het. Die een is nog by die veearts waar daar vir sy lewe geveg word.

Daar is ook op die groep gemeld dat daar wit merkers op die palissadeheining gevind is.

Een van die lede op die groep het tereg gesê dat daar waarskynlik motorfietse, sleepwaens of kwads in die straat is, wat die boewe later wil steel. “Dis bitter hartseer en onregverdig teenoor die onskuldige diere.”

Deur die jare is daar tientalle honde in Middelburg vergiftig. In die meeste gevalle was die gifstrooiers agter motorfietse aan, maar daar het soms ook ‘n inbraak gevolg.

Lees ook: Motorfiets gesteel na vlaag hondevergiftigings

Daar word gewoonlik Temik (wat taboe is in Suid-Afrika) of ander aldicarb-verbindings (wat ook die aktiewe bestanddeel is in Temik) gebruik om die honde te vergiftig. Dit is ‘n korrelrige gif, wat gewoonlik met maalvleis of ander vleis gemeng en vir honde gegee word.

Weens die feit dat Temik so vinnig werk, is dit ook bekend as ‘Two-Step’ gif.

• Die beste raad wat senior inspekteur Petro Oberholzer (bestuurder Middelburg Dierebeskermingsvereniging) tydens ‘n vorige onderhoud gegee het, is dat mense hul diere of in hul huise, in motorhuise of agter in erwe te laat slaap.