’n Gebroke Ernest Viljoen, wat onder vriende as ‘Slim’ bekend is, het vandag aan die Middelburg Observer in eie woorde vertel van die dag toe sy babaseuntjie oorlede is.

Alexander se mamma, Alta, is verlede Woensdag in die Middelburg Hospitaal opgeneem nadat hulle by die kliniek meegedeel is, dat sy hartjie “nie reg klop nie.”

Met Alta se opname, het verdere toetse bevestig dat sy hartkloppie onreëlmatig was.

Die dokter het Donderdag om 12:00 opgedaag, en Alta is om 14:00 in teater toe vir ’n noodkeiser.

Met Alexander se geboorte het die personeel hulle na die intensiewe sorgeenheid gehaas omdat sy hartjie kort-kort gaan staan het.

Ten spyte van noodbehandeling wat toegepas is, het baba Alexander dit nie gemaak nie, en nou moet Slim, Alta en Brianna (Alexander se 11-jarige sussie) hulle babaseuntjie en -boetie begrawe.

Die Viljoen gesin benodig R9 500 vir die begrafnis.

Nadat die Observer Vrydag berig het oor die gesin se behoeftes, kon R5 500 ingesamel word.
Hulle kort egter nog R4 000 vir Alexander se begrafnis.

’n Begrafnisdiens sal Vrydag om 11:00 by die PPK Lofdal Gesinskerk plaasvind.

• Persone wat bydraes wil maak, kan Herculaas Taljaard of Slim skakel by 078 773 2186 of 068 254 3110.

• Lees meer in hierdie week se Middelburg Observer.