Eers was dit watermeters wat bykans elke nag gesteel word. Nou is dit hekmotors wat in die slag bly en sommer in ‘n parkie uitmekaar gehaal word.

Diewe wat hulle deesdae toespits op hekmotors, vat dit na die parkie toe op die hoek van C.R. Swart en Njalastraat om dit uitmekaar te haal.

‘n Gesin van Dennesig wat gaan stap het afgekom op die gebreekte artikels in die parkie.

“Hulle steel hekmotors en solarligte en haal dit uitmekaar vir koper en ander goed wat hulle kan verkoop.”

Dit krap die gesin om dat die diewe dit in die parkie doen waar kinders moet speel. Boonop maak die booswigte ‘n groot gemors en kan kinders weens die glasskerwe en ander skerp vullis wat daar in die gras lê, nie kaalvoet daar loop nie.

Hulle voel daar moet meer patrollies in die omgewing gedoen word om kinders se veiligheid te verseker.