Geregtigheid vir die man onder die silwer kombers…
En, die man met die glas in sy hand tronk toe...
Dit was sewe jaar gelede, 27 April 2018.
Dit was ’n vakansiedag.
Ons het by die Middelburg Buiteklub ’n koeldrank gaan drink.
Op pad terug, het daar polisievoertuie by ’n huis in Kerkstraat gestaan.
Het gaan ondersoek instel.
’n Groot bejaarde man het by die hek gewag.
Het vir hom gevra wat gebeur het: “Rowers het oor die muur gespring en ’n man geskiet” het hy gelieg.
Het ingestap en vinnig ’n foto geneem, ’n foto van ’n man onder ’n silwer kombers.
Hy het teen ’n muur gelê… onder ’n bordjie.
Op die bordjie was iets geskryf soos “Here bewaar my huis”.
Het nog gedink, “Ja Here, bewaar my huis en nou lê daar ’n man dood”.
Sakkie en Miempie Meyer het vir jare in die huis gewoon.
Polisiemanne het soos aasvoëls op my toegesak, om te keer dat daar foto’s geneem word.
Plaas dat hulle eerder hulle werk gedoen het, almal getoets het vir residue op hulle hande.
Maar hulle was meer bekommerd oor ’n jong vrou, wat verward heen en weer op die erf rondgestuur is. Die man onder die silwer kombers se vrou…
Daar was huilende klein kindertjies.
Op pad terug kar toe, het die bejaarde man gevra “is hy dood?” Het bevestigend geantwoord.
Hy het begin struikel, probeer om sy balans te herwin, weer gestruikel en soos ’n dooie os op die sypaadjie neergeslaan.
Het die ambulansmanne, wat steeds binne die erf was, gaan roep.
Is weer terug die erf in, saam met my vrou Mariana.
By die polisie sperlint het ’n man met glas in sy hand gestaan, hy het na die man onder die silwer kombers gestaar.
Het vir hom gevra “is jy ok?”. Hy het kortaf geantwoord “ja, f…man” en ’n omstander beveel: “Gaan gooi vir my nog ’n dop in”.
Mariana het geantwoord “daar staan die skieter” en na die man met die glas in sy hand gewys.
Het haar verstom aangekyk; “Hoe weet jy dit?”
Het daar weggery en kon nie die beeld van die man onder die silwer kombers uit my kop kry nie.
Neil Somers se liedjie “Silwer Kombers” het begin om my breingolwe oor en oor te teister:
Niemand luister
As ons fluister
Begin te skree
Tot kranse antwoord gee
Die aarde bewe
En vloede woes
Die grond is bitter
En die hemel soet
Maak my snoesig toe
In my silwer kombers
Want my tyd is uit
Soos die vlam van ‘n kers
My lied is gesing
Tot die laaste vers
So maak my snoesig toe
In my silwer kombers…
So maak my snoesig toe
In my silwer kombers
Blaas trompette
Die wolke daal
My Hemelse Vader
Het my kom haal…
Neil Somers se liedjie weerklink steeds, wanneer ek aan die man onder die silwer kombers dink.
En nou, na al die jare, is daar geregtigheid vir die man onder die silwer kombers.
De Klerk, die man met die glas in sy hand…
