Ma en dogter aangeval terwyl hulle stap vir oefening
'n Vrou en haar dogter is aangeval in die straat terwyl hulle gestap het vir oefening.
‘n Graad 11 meisie moes Donderdagoggend met rooi merke oor haar keel gaan eksamen skryf nadat sy en haar ma die vorige middag aangeval is.
“Dit was nog nie eers donker nie en net voor ons aangeval is, het ‘n vrou en haar klein dogtertjie net ‘n entjie voor ons in die straat af gedraf!” het die ma (wie se naam weerhou word omdat die dogter nog minderjarig is) omgekrap gesê.
Hulle bly sowat twee maande in Groenkol en het vir oefening gaan stap toe hulle oorval is op die hoek van Suid- en Meyerstraat.
“Dit was nog lig, voor 18:00!”
Ma en dogter het opgestap in Suidstraat en hulle het dadelik opgemerk dat daar ‘n man is wat lyk of hy water afslaan by ‘n boom. Hulle het na die anderkant van die pad beweeg, waar hulle gesien het daar staan ook twee mans. Sy is nie seker waar die vierde een skielik vandaan gekom het nie.
Kort nadat hulle by die twee mans verby is, het vier mans skielik op hulle toegesak.
“Hulle het ons van agter af vasgegryp, ons kon niks doen nie!”
Die vrou en dogter is albei in hul gesigte geslaan en ook gewurg, terwyl die boosdoeners hul selfone by hulle gevat het en hul oorfone ook uitgeruk het.
Die aanvallers het daarna weggehardloop.
Die twee verskrikte vroue het gaan hulp soek en het Dagpatrollie die area gefynkam, maar die aanvallers het weggekom.
“Dit het helder oordag gebeur!” het sy ontsteld uitgeroep. “My gesig is blou en my dogter se gorrel is blou!”
Sy waarsku mense wat oefen, om eerder in groepe dit saam te doen. Sy maan ouers ook om hul kinders wat na en van die skool af loop, te leer om in groepies saam te loop om soortgelyke aanvalle te voorkom.
- Mnr. Henk le Roux het gemeld dat dit naby sy huis gebeur het en alhoewel dit nog lig was, glo hy die boewe het daar rondgehang om te wag tot donker vir ander misdaad in die area. “Dit is pikdonker in die aande omdat daar nie straatligte is wat werk nie en nou die aand was daar ‘n betreder in my erf.”
- Donker strate in Middelburg is ‘n algemene probleem en word daar uit al die uitbreidings gekla dat misdaad erg toegeneem het in die aande omdat straatligte nie werk nie.
