Die koel weersomstandighede duur hierdie week voort met reën wat byna daagliks voorspel word.

Volgens beide die Toeps (Apps) Google Weather en AccuWeather is daar elke dag tussen 40% en 70% kans vir reën.

Vandag (Maandag) sal die sonnetjie net so af en toe deurbreek met minimum- en maksimumtemperature van 12°C en 18°C, ‘n 70% kans vir laatmiddagreën en ‘n koel windjie van 11km/p/h.

Dinsdag word ‘n bewolkte dag voorspel met ‘n minimum van 13°C en ‘n maksimum van 19°C. Daar is weer ‘n 70% kans vir ligte laatmiddagreën.

Woensdag is dit bietjie warmer met ‘n deurbreek-sonnetjie en die kwik wat styg van 13°C na ‘n lekker 24°C en laatmiddagreën.

Donderdag is daar weer laatmiddagreën met minimum- en maksimumtemperature van 13°C na 23°C.

‘n Onplesierige wind van 24km/p/h sal Vrydag waai met bewolkte toestande vanaf omstreeks 10:00. Daar is egter net ‘n 20% kans vir reën met koel toestande (10°C na 17°C).

Saterdag word ‘n gedeeltelik bewolkte oggend voorspel, waarna dit vanaf omstreeks 14:00 heeltemal bewolk sal wees met ‘n 10% kans vir reën. Die minimum en maksimum temperature is 10°C na tussen 21 en 25°C.

Sondag duur die bewolkte toestande voort met ‘n minimum van 12°C wat klim na tussen 21 en 24°C. Op hierdie stadium word net 10% kans vir reën voorspel.

• Saterdag was daar ‘n haelstorm wat net deur gedeeltes van Kanonkop, Dennesig en plek-plek naby die dorp op die Stoffbergpad skade aangerig het.