Die feestyd het weer eens sy tol geëis in Middelburg, met nooddienste en verkeersbeamptes wat oor die Kerstyd en Nuwejaar onder groot druk gewerk het.

Volgens die Steve Tshwete Plaaslike Munisipaliteit is 13 motorvoertuigongelukke tussen 22 Desember 2025 en 1 Januarie 2026 hanteer.

Tragies, het twee mense hul lewens verloor, terwyl verskeie ander beseer is.

Ongelukke is onder meer aangemeld op roetes soos die N4, N11, Kranspoort, asook verskeie besige strate en afritte in en rondom Middelburg.

Brandweer- en nooddienste het ook huis- en strukturele brande, voertuigbrande, voetganger-/voertuigbrande en ’n verdrinkingsvoorval hanteer.

Die meeste voorvalle is sonder ernstige beserings afgehandel.

Intussen was die verkeersafdeling uiters aktief. In een week alleen is 29 arrestasiebevele uitgevoer, 4 000 spoedboetes uitgereik, 250 ander verkeersboetes opgelê en 11 begrafnisstoete veilig begelei.

Dié statistiek dien as ’n duidelike herinnering dat roekelose bestuur en onverskilligheid werklike gevolge het.

Die munisipaliteit doen ’n beroep op alle padgebruikers om waaksaam, verantwoordelik en geduldig te bly. Nie net tydens die feestyd nie, maar elke dag.