Elke graf vertel ’n storie
Mens twyfel of jou pen skerp genoeg is nadat jy die grafskrifte gelees het
Die boodskap laat jou klein voel.
“Geen tong of pen kan die skoonheid van die werk beskryf nie”.
En nou twyfel jy of jou pen skerp genoeg is.
Was jou pen ooit skerp genoeg?
Staan in die begraafplaas.
Is daar om ’n storie te doen oor die Steve Tshwete Munisipaliteit wat die begraafplaas skoon gesny het.
Wag vir ’n raadslid.
Soveel verhale
Begin die grafskrifte lees.
*Psalm 23:4: “Hy laat my neerlê in groenweivelde; na waters waar rus is lei Hy my heen”.
*”Ons sal eers daar Bo verstaan waarom hy so vroeg moes gaan. Die wond is diep en seer. God is liefde”.
*”PAPPA: Joh. 5:28 Moet julle nie hieroor verwonder nie, want die uur kom waarin almal wat in die gedenkgrafte is sy stem sal hoor en sal uitkom”.
*”Mooi herinneringe sal altyd in ons harte bly voortleef. Jy is ons mooiste engel in die hemel.”
*”Veilig is ons dogtertjie, sussie, kleindogter, niggie en maatjie by Jesus”.
Elke graf het ’n verhaal.
Sommige aangrypend.
Sommige onsamehangend soos die een:
“Die bouheer in die paradys werk aan sy pragpaleis nie ver van klaar is die gebou wat voor sy oog verrys. Geen tong of pen kan ooit die skoonheid van die werk beskryf. Die weelde en luister van die Goddelike verblyf. Die hemeling staan verruk Gods handewerk aanskou ’n monument van Gods genade sondaars liefde en trou.”
Daar is bekendes se grafte soos “Alta van Saffas” en haar man Wessel.
Die Coetzee egpaar sal altyd deel van die dorp se geheuebank wees.
As jy kon kies
Jy kan nie anders om te wonder nie.
Deesdae geniet verassing voorkeur.
Maar as jy kon kies; wat sou jou grafskrif wees?
Die intimiteit van die grafskrifte tref my.
“In die wind hoor ek jou lag.
“In die reën sien ek jou trane.”
Besef die stryd het nooit oor die oorgroeide begraafplaas gegaan nie.
Dit het gegaan oor die duisende trane wat daar gestort is.
Dit het gegaan oor elke graf.
Want elke graf het ’n storie.
En agter die storie, is daar ’n mens, ’n mens wie se lag steeds in die wind gehoor word…
VIDEO: Is daar nog ’n dorp in die land waar mense met geruste hart begrawe kan word? Raadsheer San-Mari Wait bedank amptenare vir hulle harde werk.
@middelburgobserver Is daar nog ’n dorp in die land waar mense met geruste hart begrawe kan word? Raadsheer, San-Mari Wait bedank amptenare vir hulle harde werk. #middelburgobserver #middelburg #stevetshwetelocalmunicipality
