Die katjie, wat gister in Groenkol vermis geraak het, is vroeër vandag sowat drie blokke van haar nuwe tuiste gevind ná ’n nag van bekommernis vir haar nuwe eienaars.

Feral Care Friends sê hulle harte “loop oor van dankbaarheid”.

Destiny doen onder omstandighede goed, maar is nog effens bang ná haar aand van avontuur.

“Sy sal gou weer besef sy is warm, veilig en by die huis,” het Charmain Potgieter (Feral Care Friends Middelburg) gesê.

Die organisasie het ook hul dank teenoor die gemeenskap uitgespreek, “Destiny is veilig terug by haar huis. Baie dankie aan elkeen wat saam bekommerd was en almal wat saam gesoek het. Dankie vir elke boodskap wat gedeel is.”

Hierdie voorval wys net weer hoe spesiaal die Middelburg-gemeenskap werklik is wanneer dit saak maak.

Die soektog het ’n veilige einde gehad – en sy het haar naam beslis gestand gedoen.