Tydens Maandagaand se Varsitybeker wedstryd tussen Ikeys en Tukkies in Pretoria was daar ’n ondersteuner op die pawiljoen met ’n plakkaat wat lees: “Ain’t no liar Ben’s on fire”.
Ben wat aan die brand is, was 2022 se Hoërskool Middelburg hoofseun, Ben Jansen van Vuuren (22).
Deesdae is hoofseun Ben ’n beer wat die skaal op 105 kilogram laat kreun. So laat kreun dat die nommer 20 trui te klein was vir hom en hy het later opgedraf in ’n nommer 24.
En die meisie met plakkaat was iemand baie spesiaal, sy skoolliefde van Hoërskool Middelburg en steeds sy grootste ondersteuner, Amore Kennedy.
Wanneer die tandheelkunde student sy studies voltooi, gaan hy dalk nie elke dag in iemand se mond loer nie, maar rugbyballe jaag.
As die beserings wegbly en hy behou sy vorm, sal dit nie verbaas as ’n provinsiale unie hom ’n kontrak aanbied nie.
Dié slimkop was deel van ’n Middie span, waaronder Grant de Jager, wat groot belofte getoon het.
De Jager is intussen by die sewes Bokke gekontrakteer.
Varsitybeker is natuurlik een groot familie.
Behalwe vir Amore was ma Katinka, pa Gerhard en boetie Henog almal daar om Ben te ondersteun. Henog is Hoërskool Middelburg se 2026 onderhoofseun sport.
Maandag vat die familie weer die pad Bloemfontein toe met Tukkies wat Shimlas in die Rosestad pak.
Die Vrystaters het Maandag ’n indrukwekkende vertoning teen Maties gelewer.
Ben was verlede jaar deel van die Tukkie span wat die universiteite (Ussa of University Sport South Africa) toernooi gewen het, deur Maties in die eindstryd met 26-21 te klop.
Oud HTS Middelburg en Puma senter, Christiaan Vlok, draf ook vir Tukkies in die Varsitybeker uit.
