Hoër Tegniese Skool Middelburg bied ook nou landbou-vakke aan met die doel om leerlinge prakties en teoreties toe te rus om die landbou-arena te betree.

Wye belangstelling vir landbouverwante vakrigtings het gelei tot die uitgebreide aanbod aan leerlinge en ouers.

Die landbouvakke, landboubestuurspraktyk en landboutegnologie, sal vir graad 10 leerders beskikbaar wees as addisionele vakkeuses.

Die skool sê dat die besluit om die vakke aan te bied, spruit uit ’n etos om leerders akademies te bemagtig om hul talente en belangstellings te ontdek, en te onwikkel, en nuwe bane te breek.

Landboubestuur sal fokus op die ekonomiese aspekte van boerdery terwyl die tegnologiese been weer leerders met praktiese vaardighede rondom grondgedrag, gewas-aanplanting en diereproduksie, meganisasie en ingenieursbeginsels sal toerus.

Die nuwe aanbiedinge sal deure vir leerders oopmaak om te boer, om plase te bestuur en ook ander landbousektore te betree.

Beide vakke sal ook vir studie aan tersiêre inrigtings aanvaar word vir graad- en diplomastudies.

Jaco van Wyk sal die teoretiese onderwys behartig terwyl Aubrey de Jager op die praktiese kant sal fokus.