Trokdrywer op Loskopdam-pad gekaap
In wat blyk ’n kaping kan wees, is ’n trokbestuurder vanoggend op die Loskopdam-pad naby Middelburg aangerand en langs die pad afgelaai.
Volgens inligting op die plaaslike Traffic Alert WhatsApp groep gedeel is, het die voorval tussen 07:15 en 07:30 in die rigting van Loskopdam plaasgevind.
Dit is ’n nuwe wit Isuzu 14-ton trok met blou seile.
Die trok is intussen langs die pad gevind met die enjin wat steeds loop. Die vermeende kaper het reeds gevlug.
Daar is aanmekaar berigte op die groep geplaas oor waar die trok gesien is.
Teen 08:30 is bevestig dat die beseerde bestuurder naby Buksies area afgelaai is, nadat hy volgens die inligting, aangerand is.
Die aard van sy beserings is nie bevestig nie.
Dit is nog onduidelik of enige verdagte aangekeer is.
Motoriste en inwoners in die omgewing is deur die groep versoek om waaksaam te bly en enige verdagte beweging by die polisie aan te meld.
