Hoe sê die huweliksformulier? “Die huwelik is deur God ingestel toe Hy aan die begin gesê het: Dit is nie goed dat die mens alleen is nie; Ek sal vir hom iemand maak wat hom kan help, sy gelyke.

So het Hy hulle as man en vrou geskep om mekaar as huweliksmaats aan te vul en by te staan. Om so deur die Here verenig te wees is ’n voorreg, ’n vreugde en ’n verantwoordelikheid.”

Daar is twee egpare op Middelburg wat die opdrag letterlik uitvoer. Hulle is nooit alleen nie…
Hulle vul mekaar aan. Hulle staan mekaar by. En dit alles is vir hulle ’n vreugde en voorreg.

Mens kan amper sê; so tussen die sweet en die swoeg, is die grootste hiervan die liefde…
André Grobler het vele wedstryde vir Middelburg gewen, met sy skopvoet of aanvalle van heelagter af.
Maar toe trou hy met vroutjie Charné Bekker. Charné is ’n drawwer.

Rugbyspelers is nou nie juis bekend dat hulle kilometers ver draf nie. André het eers met die fiets saamgery. Later die tekkies aangetrek en twee weke gelede die Twee Oseane halfmarathon kafgedraf.
Charné was braaf genoeg om die ultra-wedloop aan te durf.

Dan is daar Shaun Bekker, Charné is sy sussie. Hy is ’n Ysterman wat Sondag die Isuzu Ysterman en Suid-Afrikaanse kampioenskappe in Gqeberha voltooi het. Vroulief Lizelle het die korter weergawe van die Ysterman klaargemaak.

En hoe sê die huweliksformulier verder? “Die huwelik is ’n hegte eenheid. Hierdie eenheid is die diep geheim van ’n gelukkige lewe, die grondslag van ’n gesonde gesinslewe en die hoeksteen vir ’n stabiele samelewing. Woord en Gees, is vir mekaar, vir hul familie, die kerk en die samelewing ’n vreugde, krag en inspirasie.” Jip, ’n inspirasie!