Bekende besigheidsman, Arie Smit, is Woensdag (13 Mei) in die Life Midmed Hospitaal oorlede.

Duisende Middelburg inwoners het die afgelope 30-jaar op Smit staatgemaak om hulself en hul gesinne veilig te hou.

Daar sal volgende Saterdag (23 Mei) van die legende afskeid geneem word.

“Smit was altyd daar as daar op sy nommer gedruk is.” vertel vennoot, Wessels.

Hy en Andre Wessels was vennote in Mid-Alarms, wat op 1 Augustus 1997 homself as Middelburg se grootste sekuriteitsverskaffer gevestig het.

Dié 30-jaar band was nie net besigheid nie, maar ’n broederskap wat ontstaan het toe Smit en Wessels besluit het om hul eie besighede saam te snoer.

Wessels sê, “Die besigheid staan so sterk as toe hy begin is, te danke aan Smit se bydraes oor die jare.”

Wessels onthou veral hoe Smit hom altyd gemotiveerd gehou het met ‘kop af, vorentoe broer.’

Smit was reeds in April by Life Midmed ingeboek, vir ’n operasie.

Dinge het goed verloop in die teater, maar komplikasies het ingetree.

Smit laat sy moeder Lilly, broer Wynand, lewensmaat Annelize, sy twee kinders George en Kayla-May, en ‘n kleindogter agter.

Hy sal volgende Saterdag op sy plaas in die Kruisrivier-omgewing ter ruste gelê word.