Dit was aand en dit was more… toe loop die uurglas leeg
Kaalvoet kaptein vandag ’n reus wat burgemeester wil word
Laerskool Middelburg het by die Mpumalanga rugby uitspele vanjaar twee kampioen spanne gehad, een wat derde geëindig het en nog een wat met ’n silwer medalje weggestap het, maar in die vroeë negentigerjare was daar ’n spannetjie wat die teenstanders behoorlik voor hom platgevee het.
Die span wat in 1994 o.11 was, het sedert hulle o.9 dae 47 wedstryde gespeel, 46 gewen, 1233 punte aangeteken, net 64 teen hulle, 235 drieë gedruk en 15 teen hulle.
Die spannetjie het uit kaalvoet seuns bestaan met groot drome.
Maar hoe vinnig vlieg die tyd net nie verby nie?
Die afrigter, Adé (Kobus) Adendorff is vandag die Mpumalanga skeidsregters hoof.
Elkeen van daardie kaalvoet seuns het intussen ’n lewenspad gestap.
Spelers soos Bosman Grobler, Stuart de Lacey Lacey, Stefan Breytenbach, Paul Steyn, Van Zyl Wait, Roan Rossouw, Lionel Pienaar, Hannes Botha, Schalk van Dyk, Paul Pirrow, Jaco Combrink, Johan Coetzee, Carlo Rheeder, Francois du Toit en Johnny da Cunha, was deel van die suksesvolle Koedoekoppe.
Burgemeesterskandidaat
Vandag staan die kaptein van die span, Bosman Grobler, 1,98m in sy sokkies en pryk hy lewensgroot op die DA se blou bussie as burgemeesterskandidaat vir die munisipale verkiesing in November.
Meer nog, daar is ’n foto in ’n ou Middelburg Observer uitgawe, waar Grobler saam met burgemeester Piet Bezuidenhout en sy vrou Helen afgeneem is. Kyk net hoe parmantig kyk die seuntjie regs op die foto na die agbare burgemeester.
