Die Pumas o. 21-afrigter, Jacques Momberg, het die snoeiskêr behoorlik ingelê toe hy die span gekies het wat môre (12 September) op Mbombela teen die Limpopo Blou Bulle uitdraf.

Dit is ’n bykans totaal nuwe span ná die nagmerrie-vertoning teen Griekwas in Kimberley verlede week.
Die Pumas behoort egter nie te veel moeite te ondervind om die Limpopo Blou Bulle te klop nie.

Veral die vaste fasette het teen Griekwas gesukkel, met die flank Valera Breytenbach wat dié keer as haker gekies is. Hy moes teen Griekwas later noodgedwonge die bal by die lynstaan ingooi.

Min van verlede week se span het behoue gebly, terwyl die oud-HTS Middelburg-agterspeler, Gerry Gendall, ook nie in die finale groep is nie.

Nog ’n oud-Rooi Bul, Hanro Terblanche, maak sy terugkeer. Terblanche het verlede week nog vir Naka Bulle se o. 20-span teen Tukkies uitgedraf.
Afskop is om 14:00 by Nelspruit Rugbyklub.

Pumas o. 21:

Damian de Beer, Lian Jordaan, Benito Goeda, Kyle Alves, Jeand-Dre Claassen, Andeon Pringle, André Smit, Stephen Tshimanga, Hanro Terblanche, Nkateko Phakula, Amukelo Mtetwa, Valera Breytenbach, Eben van Wyk.

Plaasvervangers:

Jan de Wet, Siba Lamola, Jaden Packer, Stephan Nkosi, Sam Hadebe, Jaydan Mostert, Uyanda Fikizolo, Bayron Adams.