HTS Middelburg leerder by berugte brug beroof
’n Gewapende roof het kommer oor leerlinge se veiligheid laat ontstaan.
Nota aan lesers: Die storie is aangepas om 17:10 op 13/10/26. Die vorige weergawe is verwyder met die nuutste inligting hier ingesluit.
’n HTS Middelburg-leerder is van sy selfoon by die berugte Coetzeestraatbrug beroof.
Een van die twee rowers het ’n pistool uitgepluk en aan hom gesê: “Don’t make this hard.”
Hy was laat vir ’n sportoefening op 6 Oktober en het besluit om vinnig ’n kortpad met die trappe op na die brug te neem.
“Ek het gesien die twee sit daar en het verwag hier kom moeilikheid,” vertel hy.
Sy pa beskryf sy seun as ’n ‘snaakse’ kind met ’n besonderse geaardheid. Ondanks die lewensgevaarlike situasie waarin hy hom bevind het, het hy kalm met die rowers gepraat en sy iPhone 13 sonder teenstand oorhandig.
“Gelukkig het hulle fisies niks aan my gedoen nie, maar ek hoop nie iemand anders kom so iets oor nie,” het die seun gesê.
Volgens hom is die verlies van al die herinneringe wat op die selfoon gestoor was, erger as die verlies van die toestel self.
Die hoof van HTS Middelburg, Malem van Heerden, het die voorval bevestig.
Die voorsitter van die skool se beheerliggaam, Gehard Holtshauzen, sê leerlinge word aangeraai om liefs in groepe na die sportvelde te loop, wat aan die westekant van die Johan Magagulastraat is.
Arthur Hill van die Dagpatrollie-gemeenskapsveiligheidsgroep sê hy het misdaadvoorvalle by die brug by wyle Hoppie van Jaarsveldt, die vorige hoof, aangemeld om die veiligheid van leerlinge te verseker. Dagpatrollie het hulle na die jongste toneel gehaas en volg tans leidrade op.
Navrae is aan die SAPD gerig, wat gesê het dat hulle die voorval sal ondersoek.
• Daar is min inwoners wat bewus is dat die brug na mnr. Pikkie Coetzee, die oud Lid van die Parlement, vernoem is. Die stadsvaders wou eers die hele Coetzeestraat na hom vernoem, maar het later daarteen besluit. Net die brug is toe na hom vernoem. Die straat is later in elk geval herdoop na John Magagulastraat.
• ’n Vorige hoof van HTS Middelburg, Dolf Jonker, is in Augustus 2015 vroegoggend by die skool oorval en beroof. Hy het toe gesê: “Mens dink jy leef in ’n veilige kokon, maar die realiteit is, dis nêrens veilig nie.”
