White is besig om ’n A-span bymekaar te maak om Bulglorie terug te bring na Pretoria en het nou ook Toyota Verblitz, waar hy vroeër afgerig het, se Hitoshi (Ippo) Ipponsugi in sy visier.

Ipponsugi was saam met White by die Brumbies toe hy in die 2011-2013 seisoen in Australië afgerig het.

Ippo, soos hy bekend staan, het aan die Canberra Universiteit studeer en sy internskap by die Brumbies gedoen, voordat hy by Kubota Spears in Japan aangesluit het.

Hy is daarna na Toyota Verblitz waar hy en White se paaie weer gekruis het.

Sy posisie by Verblitz is “hoof van fisiese prestasie”.

Ipponsugi is egter nie die enigste aanwins in White se visier nie. Dit is alombekend dat hy sy wêreldbeker vennoot, dr Henning Gericke, wat toevallig vandag 60 jaar oud is, graag weer betrokke wil kry.

Dr Gericke het ’n groot rol gespeel in spanharmonie tydens die 2007 wêreldbeker wat die Bokke onder White gewen het.

Met ’n nuwe afrigtingspan en ’n nuwe groep spelers weet White dat dr Gericke ’n reuse verskil kan maak om die Bulspan in een rigting te laat trek.

Die Blou Bulle president, Willem Strauss, en dr Gericke kom al saam sedert hy as jong bestuurder by Mpumalanga Rugby-unie aangestel is. Dr Gericke was een van die eerste persone wat hy betrokke gekry het om die Pumas op die wenpad te kry.

Nog name wat genoem word vir White se nuwe afrigtingspan is die oud haker en biokinetikus, Jannie Brooks, en Andre Volsteed wat ook hoog aangeslaan word as krag- en kondisioneringsafrigter.

•Intussen het die Bulle aangekondig dat die Vrystaatse slot, Sintu Manjezi, op 1 Julie by die Bulle aansluit.

•Nog ’n Vrystater, Grey se afrigter, Wessel du Plessis, het verlede week ’n aanbod aanvaar om die Bulle se junior spanne onder hande te neem.